काठमाडौं । जापानको आइची–नागोया सहरमा आयोजना हुने २०औँ एसियाली खेलकुद प्रतियोगिता (एसियाड) मा सहभागी हुन लागेको नेपाली उसु टोलीलाई काठमाडौंमा आयोजित विशेष कार्यक्रममार्फत बिदाइ गरिएको छ।
नेपाल उसु महासंघको आयोजनामा भएको कार्यक्रममा एसियाडका लागि छनोट भएका खेलाडी, प्रशिक्षक तथा निर्णायकलाई शुभकामनासहित बिदाइ गरिएको हो। कार्यक्रममा सहभागी वक्ताहरूले अन्तर्राष्ट्रिय प्रतियोगितामा नेपालको प्रतिनिधित्व गर्दा अनुशासन, आत्मविश्वास र उत्कृष्ट खेल प्रदर्शनलाई प्राथमिकतामा राख्न खेलाडीहरूलाई आग्रह गरे।
आगामी असोज ३ देखि १८ गतेसम्म हुने एसियाडमा नेपालबाट उसुका १० खेलाडीले प्रतिस्पर्धा गर्नेछन्। नेपाली टोलीमा ७ पुरुष र ३ महिला खेलाडी छन्। उनीहरूले उसुका थाउलो र सान्सौँ विधामा प्रतिस्पर्धा गर्नेछन्।
टोलीमा विजय सिन्जाली, हरिप्रसाद गोले, राजीव तामाङ, सुस्मिता तामाङ, दीपक हमाल, सविता राई, रोहित चुनारा, अमर सुनार, सन्जिव महर्जन र रिता ठकुल्ला रहेका छन्।
खेलाडीहरूको प्रशिक्षण तथा प्रतियोगिताको तयारीमा प्रकाश महर्जन र तुल्सीनन्द वज्राचार्यले प्रशिक्षकको जिम्मेवारी सम्हाल्नेछन्। थाउलो टोलीको प्रशिक्षकमा प्रकाश महर्जन तथा सान्सौँ टोलीको प्रशिक्षकमा तुल्सीनन्द वज्राचार्य रहेका छन्। प्रतियोगितामा नेपालका तर्फबाट निर्णायकका रूपमा मन्जुर महर्जन सहभागी हुनेछन्।
बिदाइ कार्यक्रममा प्रतिनिधिसभा सांसद प्रभा कार्की, राष्ट्रिय खेलकुद परिषद्का बोर्ड सदस्य पवन शाही, नेपाल उसु महासंघका महासचिव नवराज ढुंगाना ‘विश्वास’ सहित महासंघका पदाधिकारी, प्रशिक्षक, खेल क्षेत्रका व्यक्तित्व तथा खेलप्रेमीहरूको सहभागिता थियो।
कार्यक्रममा वक्ताहरूले नेपाली खेलाडीहरूले लामो समयदेखि गर्दै आएको प्रशिक्षण र मेहनतलाई प्रतियोगिताको मैदानमा प्रभावकारी रूपमा प्रस्तुत गर्ने विश्वास व्यक्त गरे। उनीहरूले एसियाड जस्तो ठूलो अन्तर्राष्ट्रिय प्रतियोगितामा नेपालको पहिचान र प्रतिष्ठा थप उचो बनाउने गरी खेल्न शुभकामना दिएका थिए।
यसै अवसरमा ‘संगथा इन्भल्भ टुगेदर’ नामक संस्थाले नेपाली उसु टोलीलाई प्रोत्साहनस्वरूप सहयोग गरेको छ। संस्थाले प्रतियोगितामा सहभागी हुने खेलाडी, प्रशिक्षक तथा निर्णायकलाई आकर्षक टिसर्ट प्रदान गर्दै सम्मान गरेको हो।
लामो समयको प्रशिक्षणपछि प्रतियोगिताका लागि तयार रहेको नेपाली उसु टोली पदक जित्ने लक्ष्यसहित जापान जाने तयारीमा छ। महासंघले खेलाडीहरूको तयारी, निरन्तर अभ्यास र आत्मविश्वासका आधारमा एसियाडमा राम्रो नतिजा हासिल गर्ने अपेक्षा गरेको छ।
नेपाली खेलाडीको प्रदर्शनले अन्तर्राष्ट्रिय स्तरमा नेपालको खेलकुदको छवि थप बलियो बनाउनुका साथै नेपाली खेल क्षेत्रमा नयाँ उत्साह र सम्भावना थप्ने अपेक्षा गरिएको छ।
तपाईंको विचार लेख्नुहोस्
० कमेन्ट
Facebook प्रतिक्रिया