नेपाली लोकसंगीतमा निरन्तर सक्रिय रहँदै आएकी गायिका स्मृति गौतमको नयाँ मौलिक काठे लोकदोहोरी गीत ‘निष्ठुरे’ सार्वजनिक भएको छ। प्रेम, मिलन, बिछोड तथा ग्रामीण जीवनसँग जोडिएका भावनात्मक पक्षलाई कथात्मक शैलीमा प्रस्तुत गरिएको गीतले सार्वजनिक भएयता दर्शक–श्रोताको ध्यान तान्न थालेको छ।
‘निष्ठुरे’ मा गाउँघरको परिवेश, प्रेम सम्बन्धमा आउने उतारचढाव र जीवनका संघर्षलाई सरल तथा भावनात्मक ढंगले प्रस्तुत गरिएको छ। मौलिक लोकभाकामा तयार पारिएको गीतले ग्रामीण समाजको वास्तविकता र मानवीय संवेदनालाई कथामार्फत जोड्ने प्रयास गरेको छ।
गीतको म्युजिक भिडियो सिन्धुपाल्चोकका मेलम्ची, इन्द्रावती तथा फटकशिलालगायतका विभिन्न स्थानमा छायांकन गरिएको छ। साथै काभ्रेको सिपाघाट आसपासका प्राकृतिक तथा ग्रामीण दृश्यहरूलाई पनि भिडियोमा समेटिएको छ। स्थानीय परिवेश र प्राकृतिक सौन्दर्यले भिडियोको दृश्यात्मक पक्षलाई थप आकर्षक बनाएको देखिन्छ।
गीतको शब्द तथा लय चर्चित काठे लोकदोहोरी गायक सरोज लामिछानेले तयार पारेका हुन्। संगीत संयोजन रामकृष्ण थापाले गरेका छन्। गीतमा सरोज लामिछाने र स्मृति गौतमको स्वर रहेको छ।
म्युजिक भिडियोमा आयुष्मा कार्की, आर.के. परियार र दीपक रिजालले अभिनय गरेका छन्। भिडियोको निर्देशन खमेश श्रेष्ठले गरेका हुन् भने रामकृष्ण कँडेलले छायांकन गरेका छन्। मेकअपतर्फ डी.के. हमाल, ड्रोन क्यामेरामा उमेश शाह तथा सम्पादनमा कल्पेश विश्वकर्माको योगदान रहेको छ।
स्मृति गौतमको आफ्नै YouTube च्यानलमार्फत सार्वजनिक गरिएको ‘निष्ठुरे’ ले मौलिक लोकसंगीत मन पराउने दर्शक–श्रोतामाझ आफ्नो छुट्टै प्रभाव बनाउन खोजेको छ। ग्रामीण परिवेश, प्रेम र जीवनका भोगाइलाई लोकसंगीतको माध्यमबाट प्रस्तुत गरिएको यो गीत पछिल्लो समय सार्वजनिक भएका लोकदोहोरी सिर्जनामध्ये फरक स्वाद दिने प्रयासका रूपमा आएको छ।
तपाईंको विचार लेख्नुहोस्
० कमेन्ट
Facebook प्रतिक्रिया