तीज गीत ‘केटी पार्टी’ सार्वजनिक

हिन्दु नारीहरूको महान् पर्व हरितालिका तीज नजिकिँदै जाँदा नेपाली सांगीतिक बजारमा तीज गीतहरूको चहलपहल बढ्न थालेको छ। यसै क्रममा चर्चित गायिका शान्तिश्री परियार को स्वरमा सजिएको नयाँ तीज गीत ‘केटी पार्टी’ औपचारिक रूपमा सार्वजनिक गरिएको छ।

मंगलबार काठमाडौंको कोटेश्वरस्थित होटल तपोवन मा आयोजित विशेष कार्यक्रममा गीत तथा म्युजिक भिडियो सार्वजनिक गरिएको हो। गीतमा मनिष श्रेष्ठ को शब्द तथा संगीत रहेको छ भने आकाश नेपाली ले एरेन्ज, मिक्सिङ र मास्टरिङ गरेका छन्।

‘केटी पार्टी’ ले “उमेर कहिल्यै बाधक हुँदैन, इच्छा, आत्मविश्वास र उत्साह भए जुनसुकै उमेरमा पनि नाच्न, रमाउन र आफ्नो प्रतिभा प्रस्तुत गर्न सकिन्छ” भन्ने सकारात्मक सन्देश बोकेको छ। तीजको मौलिकता र आधुनिक प्रस्तुतिको सुन्दर संयोजन गरिएको यस गीतले सबै उमेर समूहका महिलालाई समेट्ने प्रयास गरेको छ।

गीतको म्युजिक भिडियोमा बिमला भण्डारी, सरिता थापा, कोइली थापा, सरदा श्रेष्ठ र नूतन अधिकारी को आकर्षक अभिनय तथा नृत्य रहेको छ। भिडियोको छायांकन र सम्पादन पवन सुरील ले गरेका हुन् भने कोरियोग्राफी तथा निर्देशन मनिष श्रेष्ठ ले गरेका छन्।

‘केटी पार्टी’ को म्युजिक भिडियो Manish Shrestha Official युट्युब च्यानलमार्फत सार्वजनिक गरिएको छ। भिडियोमा अभिनय गर्ने कलाकारहरू सामाजिक सेवामा सक्रिय रहँदै विभिन्न संघ–संस्थामार्फत उल्लेखनीय योगदान पुर्‍याउँदै आएका व्यक्तित्वहरू समेत हुन्। उनीहरूले उत्साह र समर्पणका साथ यस वर्ष तीज गीतमा सहभागिता जनाएको र आगामी वर्षहरूमा पनि यही टोलीमार्फत नयाँ–नयाँ तीज गीत दर्शकमाझ ल्याउने तयारी रहेको जानकारी दिएका छन्।